E’ succiesso stammatina,

dint’a Posta ‘e San Martino,

‘a signora d’o spurtiello

con il numero ventisette,

cu na scritta in ben risalto

“Ufficio Spedizione Pacchi”,

con un’aria suspettosa,

m’ha fissato dint’a ll’uocchie

e m’ha chiesto sotto voce:

Addò va stu bello pacco?

Nun capisco, ma pecchè,

comme già mi aspettasse

era pronta a fa’ dumande.

Quanta scoccio avite misso

e tutt’attuorno ben legato

con lo spago ‘e muratore:

Mamma mia quanto spreco,

avite fatto nu salame !

Va luntano, va in America,

l’aggio ditto con pudore,

è destinato a figlia mia,

è Natale e vuie sapite

quanta gioia ‘nce può sta’

‘nchiusa dint’a stu cartone.

E chedè na casciaforte

chiena ‘e oro, argiente e mirra?

Quanti ccose le mannate,

e chissà si so’ permesse?

Quanno arriva in dogana

llà ce fanno l’ispezione;

chella è gente ca nu’ scherza,

basta sule nu suspietto

e chistu pacco ‘o fanno a piezze.

Tiraie fore ‘a nu cassetto

duie tre fogli misse assieme

addò ‘ncoppo steve scritto

“ Dichiarazione Doganale”.

Iamme bello dichiarate

tutt’e ccose sapurite

nchiuse dint’a chistu pacco,

arignite chiste tre modolini

cu sta bella penna biro e…

scrivite sulamente ‘a verità.

Nell’apposita casella

“contenuto del pacco”

ci scrivo, senza pensamenti,

“indumenti personali”,

doie parole, niente cchiù.

Pe fa’ l’elenco ‘e tutt’e ccose

nun  bastava nu quaderno:

susamielli e mustacciuoli, 

tarallucci in quantità,

quatto taralli annaspati,

zeppole e struffulille,

castagne, noci e nucelline,

mille cose c’arricchiscono

‘e SSante feste di Natale;

e mmiez’a tutte chesti ccose,

na busta ‘nchiusa, culor rosa,

addò dinte steve scritto:

“ Te vulimmo tanto bbene,

                  mamma e papà”